பல்கலைப் பேராசிரியர்களின் தரத்தினை மதிப்பிட விசேட குழு !

பல்கலைக்கழக பேராசிரியர்களின் கற்பித்தல் மற்றும் அவர்களுடைய செயற்பாடுகள் என்பனவற்றினை கண்காணித்து அவர்களினுடைய தரத்தினை மதிப்பீடு செய்வதற்கான விசேட குழுவொன்றை நியமிப்பதற்கு பல்கலைக்கழக பேராசிரியர்களின் சங்கம் நடவடிக்கை எடுத்துள்ளது. பல்கலைக்கழக பேராசிரியர் சங்கத்தின் நிறைவேற்றுக் குழுக் கூட்டத்தில் இதற்கான விசேட குழுவை நியமிப்பதற்கான நடவடிக்கை எடுக்கப்பட்டுள்ளதாக சங்கத்தின் தலைவர் பேராசிரியர் நிர்மால் ரஞ்ஜித் தேவசிறி தெரிவித்துள்ளார். இக்குழுவின் ஊடாக பல்கலைக்கழக பேராசிரியர்களின் கற்பித்தல் நடவடிக்கைகள் உள்ளிட்ட பல்வேறு பிரிவுகள் தொடர்பில் விசேட கவனம் செலுத்தப்படும். அவர்களது நடவடிக்கையினை மதிப்பீடு செய்வதுடன் குறித்த விடயங்களில் காணப்படும் பிரச்சினைகள் தொடர்பிலும் விசேட குழு ஆராயவுள்ளது. அத்துடன் பல்கலைக்கழக பேராசிரியர்கள் தமது தரத்தினை உயர்த்திக் கொள்வதற்கு வேண்டிய நடவடிக்கைகள் தொடர்பிலும் இதன் போது கவனம் செலுத்தப்படவுள்ளது. பேராசிரியர்களின் தரம் அடங்கிய அறிக்கையினை விசேட குழுவினரிடம் இருந்து விரைவில் கிடைக்கும் என தாம் எதிர்பார்ப்பதாகவும் பல்கலைக்கழக பேராசிரியர்கள் சங்கத்தின் தலைவர் மேலும் தெரிவித்துள்ளார்.